OPERA

Pigljene 'e piccie manco fossere bammine.
Te fanno piglia' collera pecchè so' birichine.

Se mettene 'a fenesta, aspettanne ca tuorne.
Si 'e scuopre s'assasconnono, pecchè tenene scuorne.

So' criature crisciute ca pazzeano a fa' 'e gruosse.
Te fanno mettere paura quanno tenene'a tosse.

C'ô mussillo spuorco se magnene 'a menesta
e te guardene dubbiuse cu 'na faccella mesta.

Tenene timore ca 'a 'nu mumento a n'ato,
senza 'nu mutivo, venene abbandunate.

So' gruosse piccerille, ca vanno cuntrullate,
pe nun care' camminene appujate.

'A vista nunn'è bbona, ma sanno ca sì ttu.
Assaje brutto è quanno nun s'arricordene chiù.

Te guardene curiuse, cercanno e tene' 'a mmente,
'na faccia famigliare, 'nu ricordo, 'nu frammento.

Primma o poi se nne vanne, lente e suspiranne.
Tremmene cu 'e mmane mentre vanne salutanne.

Po' succere ca pe 'nu mumento 'e vide assettate lla'.
Te guarde 'a seggia vacante e vaje a ll'abbraccia'.